Gjykata rrëzon kërkesën e Veliajt për transmetim “live” të seancave

Gjykata e Posaçme ka rrëzuar kërkesën e kryebashkiakut të Tiranës, Erion Veliaj, për transmetimin live të seancave gjyqësore ndaj tij.

Pas kthimit nga dhoma e këshillimit, trupa gjykuese vendosi të mos pranojë kërkesën për transmetimin e drejtpërdrejtë të seancave, duke argumentuar se për këtë çështje ishte shprehur më herët me vendim.

Po ashtu, gjykata rrëzoi edhe kërkesën për administrimin e provave dixhitale, me arsyetimin se bëhej fjalë për të njëjtën kërkesë për të cilën ishte marrë më parë një vendim.

Në të njëjtën seancë u rrëzua edhe kërkesa e Veliajt për daljen nga ndarja me xham, si dhe kërkesa që seancat të zhvilloheshin një herë në dy javë. Gjykata vendosi gjithashtu pezullimin e afateve të paraburgimit për Veliajn.

Ndërkohë, gjykata pranoi kërkesën e avokatit të Ajola Xoxa për shtyrjen e seancës, me qëllim njohjen me aktet e dosjes.

Seanca e radhës është caktuar të zhvillohet më 23 qershor, në orën 10:00.