Gjyqi për pasuritë e sekuestruara, dëshmon Mustafa Martinaj babai i Ervis Martinaj

Në seancën e kësaj të enjteje në Gjykata e Posaçme kundër Korrupsionit dhe Krimit të Organizuar (GJKKO), në procesin për pasuritë e sekuestruara, ka dëshmuar Mustafa Martinaj, i cili ka dhënë shpjegime mbi burimet e të ardhurave dhe jetën familjare.

Gjatë dëshmisë së tij, Martinaj ka folur për periudhën e viteve të para 2000, duke përmendur se një pjesëtar i familjes, i identifikuar si “Visi”, ka qenë fillimisht student në Parma, ku sipas tij ka studiuar ekonomi me bursë për rreth dy vite, përpara se të kthehej në Shqipëri dhe të vendosej në Tiranë pranë familjes.

Ai ka deklaruar gjithashtu se familja ka pasur aktivitet ekonomik të deklaruar dhe se, sipas tij, në periudha të vështira ka qarkulluar shuma të mëdha parash, duke përmendur edhe raste kur ka lëvizur me qindra mijëra dollarë cash.

“Kam ecur me 800 mijë dollarë në makinë, në kohë të vështira, në ‘99 kur bandat ishin rrugës”, është shprehur Martinaj gjatë dëshmisë, duke shtuar se paratë, sipas tij, kanë ardhur nga aktiviteti i tij ekonomik dhe janë të dokumentuara.

Ai ka folur edhe për blerje automjetesh dhe banesash për familjarët, si dhe për kredi bankare të marra për këto qëllime, ndërsa ka deklaruar se ka ushtruar aktivitet përmes një institucioni privat financiar në atë kohë.

Procesi në GJKKO vijon, ndërsa dëshmitë pritet të analizohen në kuadër të hetimit për justifikimin e pasurive të sekuestruara.