Gogu në Strasburg: Forcimi i standardeve të Konventës Europiane, pjesë e pandarë e rrugës drejt BE-së

Ministri i Drejtësisë, Toni Gogu, zhvilloi sot një takim në Strasburg me Presidentin e Gjykatës Europiane të të Drejtave të Njeriut, Mattias Guyomar.

Në fokus të bisedimeve ishte zbatimi i Konventës Europiane për të Drejtat e Njeriut, ekzekutimi i vendimeve të Gjykatës së Strasburgut dhe progresi i reformës në drejtësi në Shqipëri.

Gogu vlerësoi Gjykatën Europiane të të Drejtave të Njeriut si një nga shtyllat themelore të sistemit europian të mbrojtjes së të drejtave të njeriut, duke theksuar se forcimi i zbatimit të standardeve të Konventës në nivel kombëtar është një element kyç për ndërtimin e shtetit të së drejtës dhe për procesin e integrimit europian të Shqipërisë.

Në takim ishte i pranishëm edhe gjyqtari shqiptar në Gjykatën Europiane të të Drejtave të Njeriut, Darian Pavli, me të cilin u ndanë përvojat mbi procesin e reformës në drejtësi në Shqipëri.

Në një reagim në rrjetet sociale, ministri Gogu tha se “Në Strasburg pata kënaqësinë të takohem me Presidentin e Gjykatës Europiane të të Drejtave të Njeriut, Mattias Guyomar. Diskutuam mbi zbatimin e Konventës Europiane për të Drejtat e Njeriut, ekzekutimin e vendimeve të Gjykatës së Strasburgut dhe progresin e reformës në drejtësi në Shqipëri. Gjykata Europiane e të Drejtave të Njeriut mbetet një nga shtyllat themelore të sistemit europian të mbrojtjes së të drejtave të njeriut. Për Shqipërinë, forcimi i zbatimit të standardeve të Konventës në nivel kombëtar është pjesë e pandashme e ndërtimit të shtetit të së drejtës dhe e rrugës sonë drejt Bashkimit Europian. I lumtur gjithashtu që në këtë takim ishte i pranishëm edhe gjyqtari shqiptar në Gjykatë, Darian Pavli, me të cilin kemi ndarë vite pune në procesin e reformës në drejtësi.”