HISTORI Pompei, qyteti ku këmbësorët kishin vijat e tyre të bardha

– Në qytetin antik të Pompeit, romakët kishin krijuar një sistem të zgjuar kalimesh për këmbësorët, të cilat mund të konsiderohen si pararendëset e vijave të bardha të sotme, shkruan focus.it.

Në vend të bojës, ato përbëheshin nga blloqe të mëdha guri të ngritura mbi nivelin e rrugës dhe të vendosura në rreshta përtej karrexhatës, duke lidhur të dy anët e trotuarit.

Këto kalime ishin projektuar për t’u lejuar këmbësorëve të kalonin rrugën pa u lagur nga uji i shiut apo ujërat e rrjedhshme dhe pa u penguar nga brazdat e thella të krijuara nga rrotat e qerreve.

Në të njëjtën kohë, hapësirat mes gurëve ishin llogaritur me kujdes, në mënyrë që qerret të mund të kalonin pa vështirësi, duke treguar nivelin e lartë të planifikimit urban në qytetet romake.

Kalimet vendoseshin kryesisht pranë hyrjeve të domus-eve (shtëpive romake), tabernae-ve (dyqaneve dhe lokaleve) si edhe ndërtesave publike, për të lehtësuar hyrjen dhe daljen e banorëve, tregtarëve dhe vizitorëve.

Këto struktura, të ruajtura deri në ditët e sotme, dëshmojnë se romakët i kushtonin rëndësi jo vetëm organizimit të trafikut, por edhe sigurisë dhe komoditetit të këmbësorëve.