Hoxha në Luksemburg, pritet nga homologu Rasmussen: Vendimi për hapjen e ambasadës daneze në Tiranë, moment historik

Ministri për Evropën dhe Punët e Jashtme, Ferit Hoxha, është pritur në Luksemburg në një takim nga homologu Lars Lokke Rasmussen.

Me një postim në rrjetin social X, ministri vlerësoi diskutimet mbi forcimin e marrëdhënieve dypalëshe dhe hapjen e mundësive të reja të bashkëpunimit në fusha me interes të përbashkët.

Hoxha theksoi se në takim u shkëmbyen mendime edhe për procesin e zgjerimit të Bashkimit Evropian, duke nënvizuar rëndësinë e një procesi të besueshëm dhe të bazuar në meritë, që forcon si vendet kandidate ashtu edhe vetë BE-në. Ai vlerësoi mbështetjen e vazhdueshme të Danimarkës për integrimin evropian të Shqipërisë dhe perspektivën e Ballkanit Perëndimor, si dhe rolin e saj gjatë Presidencës së Këshillit të BE-së në vitin 2025.

Gjithashtu, ministri Hoxha vlerësoi diskutimet mbi dinamikën në Ballkanin Perëndimor, duke theksuar se bashkëpunimi rajonal mbetet thelbësor për stabilitetin, prosperitetin dhe procesin e integrimit evropian. Në përfundim të takimit, ai i përcolli homologut danez ftesën për vizitë në Shqipëri dhe për pjesëmarrje në hapjen e Ambasadës së Danimarkës në Tiranë.

“Një takim shumë produktiv me Ministrin e Punëve të Jashtme të Danimarkës, Lars Løkke Rasmussen. Diskutuam mënyrat për të forcuar më tej marrëdhëniet tona dypalëshe dhe për të zhbllokuar mundësi të reja për bashkëpunim në fusha me interes të ndërsjellë. Gjithashtu shkëmbyem mendime për zgjerimin e BE-së, duke riafirmuar rëndësinë e një procesi të besueshëm dhe të bazuar në meritë, që forcon si vendet kandidate ashtu edhe vetë Bashkimin Evropian. Në këtë kontekst, shpreha mirënjohjen tonë për mbështetjen e vazhdueshme të Danimarkës për rrugën e pranimit të Shqipërisë në BE dhe për perspektivën evropiane të të gjithë rajonit, si dhe për lidershipin e saj të fortë gjatë Presidencës së Këshillit të Bashkimit Evropian në vitin 2025. Diskutuam dinamikën aktuale në BallkaninPerëndimor dhe ramë dakord që bashkëpunimi rajonal mbetet thelbësor për stabilitetin, prosperitetin dhe integrimin evropian. I bëra një ftesë kolegut tim për të vizituar Shqipërinë sa më shpejt të jetë e mundur, si dhe për të festuar hapjen e Ambasadës Daneze në Tiranë, një moment historik që pasqyron forcën në rritje të partneritetit tonë dypalësh”, shkruan Hoxha.