I shpallur në kërkim ndërkombëtar për trafik droge, kapet në Rinas 32-vjeçari nga Kukësi

Një 32-vjeçar i shpallur në kërkim ndërkombëtar nga autoritetet e Kosovës është kapur dhe arrestuar në Rinas, me qëllim ekstradimin drejt Kosovës.

Shtetasi me inicialet A. Sh., banues në Kukës, akuzohet nga autoritetet kosovare për veprën penale “Blerja, posedimi, shpërndarja dhe shitja e paautorizuar e narkotikëve”.

Arrestimi i tij u krye nga shërbimet e Forcës së Posaçme “Shqiponja”, në kuadër të operacionit të koduar “Wanted”, pas informacionit të siguruar në rrugë operative dhe shkëmbimit të të dhënave me Interpol Tiranën.

Sipas Policisë, në momentin e ndalimit, 32-vjeçari është prezantuar me një tjetër identitet, në përpjekje për të shmangur identifikimin dhe arrestimin.

Ai ishte shpallur në kërkim ndërkombëtar pasi Gjykata Themelore e Prishtinës kishte lëshuar urdhër-arrest ndaj tij për veprën penale të lidhur me narkotikët.