IKTK dhe Kryegjyshata Bektashiane, bashkëpunim për mbrojtjen e trashëgimisë kulturore

Në mjediset e Kryegjyshatës Botërore Bektashiane u zhvillua një takim ndërmjet përfaqësuesve të Institutit Kombëtar të Trashëgimisë Kulturore (IKTK) dhe Baba Mondit, Kryegjyshit Botëror të Bektashinjve.

Në qendër të takimit ishte bashkëpunimi institucional për ruajtjen, konservimin dhe restaurimin e pasurive kulturore të trashëgimisë bektashiane. Gjatë bisedës vëmendja u përqendrua në dy monumente të rëndësishme për bektashinjtë, siç janë “Vendi i Mirë Ballëm Sulltan (Guva)”, pranë Teqesë së Vjetër, në Ballenjë, Martanesh, si dhe Teqeja në fshatin Pesh.

IKTK dhe Baba Mondi biseduan rreth gjendjes aktuale të këtyre objekteve, problematikat e evidentuara dhe mundësitë për ndërhyrje, duke synuar përmirësimin e aksesit dhe sigurisë, menaxhimin e ujërave dhe ruajtjen e vlerave autentike të monumenteve.

IKTK bëri të ditur se, së bashku me Kryegjyshatën Botërore Bektashiane do të vijojnë koordinimin dhe bashkëpunimin për mbrojtjen dhe përcjelljen e kësaj trashëgimie të çmuar kulturore te brezat e ardhshëm.