Ilaçet për humbjen e peshës rrisin rrezikun për verbim të papritur

– Barnat e grupit GLP-1, të përdorura gjerësisht për diabetin e tipit 2 dhe obezitetin – përfshirë semaglutide (Ozempic, Wegovy) dhe tirzepatide (Mounjaro, Zepbound) – po hetohen për një lidhje të mundshme me një sëmundje të rrallë të syrit, që mund të shkaktojë humbje të papritur të shikimit.

Gjendja quhet “neuropati optike iskemike anteriore jo-arteritike” (NAION).

Ajo ndodh kur furnizimi me gjak i nervit optik ndërpritet, duke shkaktuar dëmtim të nervit, që transmeton informacionin vizual nga syri në tru.

Në disa raste, humbja e shikimit mund të jetë e përhershme.

Çfarë zbuluan studiuesit?

Një studim i publikuar në “JAMA Ophthalmology” analizoi të dhëna nga 37,1 milionë të rritur me diabet të tipit 2, të mbledhura nga 14 baza të mëdha shëndetësore ndërkombëtare.

Studiuesit gjetën një rritje të vogël të incidencës së NAION tek përdoruesit e “semaglutide”, krahasuar me personat që nuk e përdornin atë.

Një tjetër studim më i hershëm, që përfshiu rreth 16 mijë pacientë, raportoi gjithashtu një lidhje mes përdorimit të “semaglutide” dhe rritjes së rrezikut për NAION, por autorët theksuan se nevojiten kërkime të tjera për të provuar nëse ilaçi është shkaku direkt.

A do të thotë kjo se këto ilaçe shkaktojnë verbëri?

Jo domosdoshmërisht. Por, studiuesit theksojnë se deri tani është zbuluar një lidhje statistikore, jo një provë përfundimtare se barnat GLP-1 shkaktojnë dëmtimin e nervit optik.

Shumë faktorë të tjerë – si diabeti, presioni i lartë i gjakut, mosha dhe sëmundjet vaskulare – janë gjithashtu faktorë rreziku për NAION.

Sa i madh është rreziku?

NAION mbetet një komplikacion shumë i rrallë.

Ekspertët këshillojnë që pacientët që përdorin këto barna dhe dallojnë, humbje të papritur të shikimit; turbullim të shikimit dhe njolla të errëta në fushën e shikimit, të kërkojnë menjëherë vlerësim nga mjeku okulist.

Barnat si “Ozempic” dhe “Wegovy” mbeten ndër trajtimet më efektive për diabetin dhe obezitetin, por studimet e reja sugjerojnë nevojën për monitorim të kujdesshëm të një komplikacioni të rrallë të syrit. /