IRGC sfidon CENTCOM-in: provoni pastrimin e minave në Hormuz me fakte, jo me deklarata

Garda Revolucionare Islamike e Iranit (IRGC) ka sfiduar Komandën Qendrore të SHBA-së (CENTCOM) që ta provojë me fakte pretendimin se Ngushtica e Hormuzit është pastruar plotësisht nga minat detare, siç njofton Al Jazeera.

Zëdhënësi i IRGC-së, gjeneral brigade Hossein Mohebbi, i kërkoi CENTCOM-it ta mbështesë pretendimin për pastrimin e minave me prova të verifikueshme në mënyrë të pavarur, jo me deklarata. “Realiteti në Ngushticën e Hormuzit përcaktohet në ajër, në tokë dhe në det, jo në rrjetet sociale apo në dhomat e luftës mediatike të SHBA-së”, tha ai, sipas Press TV.

Mohebbi përmendi si shembull krizën e Suezit të vitit 1956, kur edhe një fuqi si Britania u përball me kufizime në përpjekjen për të kontrolluar një rrugë detare me rëndësi jetike. Deklarata erdhi pasi marina e IRGC-së njoftoi se tre cisterna nafte kishin shpërthyer dhe kishin marrë flakë pasi kishin goditur mina detare në një rrugë jugore të ngushticës, të cilën Teherani e quan të paautorizuar.

Në të njëjtën ditë, zëdhënësi i ushtrisë iraniane, gjeneral brigade Mohammad Akraminia, theksoi se Ngushtica e Hormuzit ndodhet nën kontrollin strategjik të forcave të armatosura të Iranit dhe do të mbetet e mbyllur derisa të plotësohen plotësisht kushtet e Republikës Islamike.