Ish-analisti i Pep Guardiolës, Carles Planchart, ka zbuluar detaje interesante rreth përpjekjeve të Barcelonës për transferimin e sulmuesit norvegjez Erling Haaland.

Duke folur në emisionin “La Posesión de SPORT”, Planchart tregoi se gjatë muajit mars është zhvilluar një takim me përfaqësuesit e Haalandit për të kuptuar nëse sulmuesi ishte i gatshëm të largohej nga Manchester City dhe ta konsideronte FC Barcelona si destinacionin e tij të ardhshëm.

“Ka pasur një takim në mars. Ishte për të parë nëse Haaland dëshironte të largohej nga City dhe t’i jepej përparësi Barcelonës. Në atë kohë, kjo çështje kishte edhe peshë në fushatën zgjedhore”, u shpreh Planchart.

Ai theksoi se ylli norvegjez e sheh me sy të mirë mundësinë për të luajtur në La Liga dhe se futbolli spanjoll i përshtatet karakteristikave të tij.

“E shoh Haaland te Barcelona. Ai është një sulmues tipik zone dhe jam i bindur se do t’i pëlqente të luante në Spanjë”, deklaroi Planchart.

Sipas tij, Real Madrid CF nuk do të ishte destinacioni ideal për Haalandin, kryesisht për shkak të pranisë së Kylian Mbappé dhe profilit të lojës që ka skuadra madrilene.