Izraeli nis sulme ajrore në Libanin jugor pasi Hezbollahu lëshoi dron “shpërthyes”

Ushtria izraelite ka kryer të dielën sulme ajrore në Libanin jugor, duke synuar atë që i përshkroi si objektiva ushtarake të Hezbollahut, siç raporton Al Jazeera. Sipas njoftimit ushtarak, sulmet erdhën pasi luftëtarët e Hezbollahut kishin lëshuar një “dron shpërthyes” ndaj forcave izraelite.

Sulmet e së dielës vijnë në një kohë kur Izraeli vazhdon të mbajë të pushtuar rreth 6 për qind të territorit libanez dhe ka refuzuar të tërhiqet, pavarësisht kushteve të armëpushimit të nëntorit 2024. Agjencia zyrtare libaneze e lajmeve ka raportuar rregullisht për sulme izraelite në jug të vendit gjatë gjithë konfliktit.

Vetëm një ditë më parë, ushtria izraelite njoftoi se kishte goditur një depo armësh të Hezbollahut në Libanin jugor, ndërsa valët e sulmeve ajrore dhe artilerike në zonat kufitare janë bërë pothuajse të përditshme.

Zhvillimi vjen paralelisht me tensionet e larta rreth Ngushticës së Hormuzit, ku Teherani pret përgjigjen zyrtare të Uashingtonit për planin e tij 7-ditor, pasi presidenti Trump e refuzoi publikisht propozimin të shtunën.