JERUZALEM – Netanyahu: Hamasi nuk do të ketë më kurrë pushtet në Gaza

JERUZALEM, 5 tetor /ATSH-AFP/ – Kryeministri izraelit, Benjamin Netanyahu deklaroi sot gjatë ceremonive përkujtimore të sulmeve të Hamasit më 7 tetor 2023, se organizata palestineze nuk do të ketë më kurrë asnjë pushtet në Rripin e Gazës.

Ndërkohë, e ardhmja politike dhe mënyra e qeverisjes së territorit mbeten ende të pasigurta.

Izraeli zhvilloi një ditë kombëtare përkujtimore, rreth tre vjet pas sulmit më të përgjakshëm në historinë e vendit.

Flamujt në ndërtesat publike u ulën në gjysmë shtize në orën 06:29, kur Hamasi, i cili kishte qeverisur Gazën që nga viti 2007, nisi infiltrimin në territorin izraelit.

“Nuk do të ketë asnjë pushtet të Hamasit në Gaza”, deklaroi Netanyahu gjatë një ceremonie në varrezat ushtarake të Malit Herzl në Jerusalem.

Ai tha se Izraeli kishte bërë përparime të mëdha, por se ende mbeteshin detyra për t’u përmbushur dhe u zotua të vazhdonte goditjen ndaj personave të përfshirë në sulmin e 7 tetorit.

Sipas një bilanci, të bazuar në të dhëna zyrtare izraelite, sulmi i 7 tetorit shkaktoi 1 221 viktima në Izrael, shumica civilë.

Në një fjalim tjetër më vonë gjatë ditës, Netanyahu tha se qëndronte në krah të familjeve të viktimave dhe se i gjithë kombi ndante dhimbjen e tyre.

Por fjalimi u ndërpre për pak kohë kur një prej të pranishmëve e akuzoi kryeministrin se nuk kishte mbrojtur djalin e tij dhe rreth 1200 personat e vrarë më 7 tetor.

Në kundërpërgjigjen ushtarake izraelite në Gaza, numri i viktimave ka kaluar në 74 200, sipas Ministrisë së Shëndetësisë të territorit palestinez, e cila është nën autoritetin e Hamasit.

Kombet e Bashkuara i konsiderojnë përgjithësisht të besueshme këto të dhëna, megjithëse ato nuk bëjnë gjithmonë dallim të plotë midis civilëve dhe luftëtarëve.

Pavarësisht armëpushimit të shpallur nga presidenti amerikan Donald Trump në tetor 2025, e ardhmja politike e Gazës mbetet e paqartë, veçanërisht për sa i përket forcës ose strukturës që do ta qeverisë territorin pas konfliktit. /Ad.Ab./ a.jor.