Juventus rrezikon të humbë liderin e mbrojtjes. Vjen oferta 58 milionë euro nga Man. United

Duke qenë se Juventus është thuajse jashtë Champions League për sezonin e ri, bardhezinjtë pritet të humbasin këtë verë disa nga lojtarët e tyre më të rëndësishëm.

Qendërmbrojtësi i Juventusit, Gleison Bremen, ka përfunduar në radarin e Manchester United, bëjnë të ditur mediet angleze. Braziliani pëlqehet shumë nga Michael Carrick, i cili mesa duket do të vazhdojë të drejtojë “Djajtë e Kuq” edhe për sezonin e ri.

Bremer është nën kontratë me bardhezinjtë deri në vitin 2029 dhe ka një klauzolë largimi rreth 60 milionë euro. Oferta e parë e Manchester United sipas raportimeve nga mediet angleze është rreth 58 milionë euro, shumë afër klauzolës së vendosur nga Juventus.

Pavarësisht se Bremer është lideri i mbrojtjes së tyre, bardhezinjtë do ta kenë shumë të vështirë të mbajnë brazilianin për sezonin e ri, duke qenë jashtë Champions League. Përveç Bremer, do të ketë edhe titullarë të tjerë si Kenan Yildiz apo Andrea Cambiaso, që do të jenë në qendër të merkatos verore.