Kina planifikon investime të mëdha në hekurudha në 2016-n

Autoritetet hekurudhore në Kinë po planifikojnë të ruajnë nivelin e lartë të investimeve brenda vendit në vitin 2016, duke nxitur njëkohësisht më shumë kompani të eksplorojnë tregjet e huaja.

Në një mbledhje pune të Korporatës së Hekurudhave të Kinës të dielën në Pekin, menaxheri i përgjithshëm i kësaj korporate Sheng Guangzu bëri të ditur se Kina planifikon të investojë sivjet 800 miliardë juanë (123 miliardë dollarë amerikanë) për hekurudhat, sidomos në rajonet më pak të zhvilluara qendrore e perëndimore.

“Detyrat kryesore të punës sonë gjatë këtij viti janë: transporti i sigurt gjatë tërë vitit, investimi i 800 miliardë juanëve në pasuri fikse, rritja 10 për qind e transportit të udhëtarëve dhe 2 për qind e transportit të mallrave në krahasim me vitin e kaluar, si dhe rritja e fitimeve,” u shpreh Sheng.

Në mbledhje gjithashtu u vu theksi në projektet globale të Korporatës së Hekurudhave të Kinës, duke përfshirë edhe hekurudhën e shpejtësisë së madhe që lidh Xhakartën me Bandungun në Indonezi.

Kryetari i Grupit Ndërkombëtar Hekurudhor të Kinës Yang Zhongmin beson se ky projekt do të jetë simbol i daljes jashtë vendit të kompanive hekurudhore kineze. “Hekurudha e shpejtësisë së madhe Xhakartë-Bandung është një nga projektet më të rëndësishme të Korporatës së Hekurudhave të Kinës në tregun e huaj. Nënshkrimi i saj i suksesshëm do të bëhet një pikë referimi për investimet kineze në hekurudhat e shpejtësisë së madhe jashtë vendit dhe do të sjellë perspektiva të reja për këto investime,” tha Yang. Projekti i përbashkët kino-indonezian i hekurudhës Xhakartë-Bandung, me vlerë 5.5 miliardë dollarë amerikanë, do të vihet në zbatim sivjet.