KINEMA – Hayden Panettiere, ylli i ”Heroes” dhe ”Nashville”, vdes në moshën 36-vjeçare

LOS ANXHELES, 17 gusht /ATSH-DPA/ – Aktorja amerikane Hayden Panettiere, e njohur për rolet e saj në serialet “Heroes“ dhe “Nashville“, si dhe në filmat e serisë “Scream”, ka vdekur në moshën 36-vjeçare.

Lajmi u konfirmua nga familja e saj përmes një deklarate të bërë publike nga përfaqësuesja e aktores.

Babai i saj, Skip Panettiere, e përshkroi Hayden si një person të jashtëzakonshëm që u kishte sjellë dashuri dhe gëzim të madh njerëzve që e njihnin dhe miliona fansave që e kishin ndjekur në ekran.

Familja ka kërkuar privatësi ndërsa përballet me humbjen e rëndë.

Shkaku i vdekjes nuk është bërë ende publik.

Sipas raportimeve të fundit, rrethanat e vdekjes janë duke u hetuar dhe autoritetet nuk kanë dhënë deri tani një shpjegim zyrtar për atë që ka ndodhur.

Panettiere u bë e famshme në mbarë botën në vitin 2006, kur interpretoi Claire Bennet në serialin fantastiko-shkencor “Heroes”.

Roli i vajzës me aftësi mbinatyrore e shndërroi në një prej figurave më të njohura të televizionit amerikan dhe i solli disa çmime Teen Choice.

Ajo pati një tjetër sukses të madh me serialin muzikor “Nashville,” ku luajti personazhin Juliette Barnes dhe tregoi edhe aftësitë e saj si këngëtare.

Për këtë rol ajo mori dy nominime për Golden Globe, ndërsa disa prej këngëve të saj në serial u renditën në klasifikimet muzikore amerikane./ /Ad.Ab./ a.jor.