“Klithmë Mesdhetare”, shfaqja e dancit bashkëkohor në Muzeun Arkeologjik të Durrësit

Në Muzeun Arkeologjik të Durrësit u vu në skenë shfaqja “Urlo Mediterraneo – Klithmë Mesdhetare”, një shfaqje që ndërthur fuqishëm kërcimin bashkëkohor, teatrin, fjalën dhe muzikën, duke sjellë në skenë dramën njerëzore të emigrimit dhe shpresës.

Nën regjinë dhe koreografinë e Lino Privitera, artistët e Compagnia Danza Contemporanea nga Italia, së bashku me Jusuf Beshirin & OSFA String Quartet, krijuan një dialog të ndjerë mes lëvizjes, tingullit dhe emocioneve. Programi u pasurua nga interpretimi i melodive arbëreshe, një urë e gjallë mes kulturave dhe kujtesës sonë të përbashkët mesdhetare.

Artistët përcollën tek të pranishmit ndjeshmërinë dhe profesionalizmin e tyre, duke bërë që publiku ta përjetonte këtë mbrëmje me vëmendje e emocion.

Sonte në mbrëmje një tjetër magji muzikore ofron Chamber Fest Durrës. Një mbrëmje me muzikën e jashtëzakonshme të Vivaldit, e interpretuar nga artistët e mrekullueshëm të festivalit të muzikës së dhomës.