Knezeviq: Serbët në Mal të Zi tashmë janë bërë pakicë kombëtare

“Nuk kaluan as shtatë ditë nga zgjedhjet në Serbi, e serbët në Mal të Zi tashmë u bënë pakicë kombëtare”, ka deklaruar kryetari i Partisë Popullore Demokratike (DNP), Milan Knezeviq, siç njofton portali CdM.

Reagimi i Knezeviqit erdhi pas deklaratës së Dejan Shoshkiqit, dhënë për gazetën “Pobjeda”, se do të rishikohet mënyra se si janë shpenzuar paratë që nga Serbia kanë shkuar në Mal të Zi. Knezeviq e quajti këtë lajm një “dhuratë” që, sipas tij, e solli “Pobjeda” përmes gojës së Shoshkiqit.

“Po të mos ishte fotografia e Shoshkiqit në ‘Pobjeda’, çdokush do të mendonte se këtë e kanë thënë Gjukanoviq, Plenkoviq dhe Kurti. Tani do të ishte mirë që ‘serbët e mëdhenj’ të Malit të Zi t’i thonë Shoshkiqit se ne nuk jemi pakicë kombëtare dhe se çdo i treti banor është serb në Malin e Zi, të cilin paraardhësit tanë e çliruan dhe e krijuan”, ka shkruar Knezeviq në një postim në rrjetin social Facebook, siç raporton CdM.

Në fund të reagimit, kreu i DNP-së ironizoi edhe me rrugën evropiane të Malit të Zi, duke shtuar: “Por tani është shumë ‘serbe’ të heshtësh, sidomos që gjuha kroate do të na bëhet zyrtare kur të hyjmë në BE. E çfarë do të bëjmë atëherë?”