Koncerti i Kanye West, Rama: Jo më pak se 100 milionë euro të ardhura për ekonominë

Kryeministri Edi Rama reagoi sot sërish lidhur me koncertin e Kanye West.

Rama deklaroi se qeveria ndërhyri me një financim prej 4 milionë eurosh për të garantuar zhvillimin e koncertit të Kanye West, duke e cilësuar ndërhyrjen si të domosdoshme për të mos dëmtuar imazhin e Shqipërisë përballë mijëra vizitorëve të huaj.

“4 milionë euro në minutën e fundit, për të mos turpëruar Shqipërinë, në sytë e afro 25 mijë të huajve nga 80 shtete që gjer më sot kanë blerë me kohë biletat për Kanye West; për të mos humbur një mundësi fantastike promovimi të Shqipërisë Turistike, për një nga komunitetet më të mëdha të botës, dashamirët e muzikës; për të stimuluar ekonominë, e cila sa për një shembull, sipas UEFA-s, pati një hyrje prej 160 milionë eurosh nga Finalja e Conference League-s, ndërkohë që nga ky koncert – në kushtet e vështirësuara artificialisht prej dështakzemërakëve – ne llogarisim jo më pak se 100 milionë euro të ardhura”, shkroi Rama.

Rama shtoi se rritja e rezervimeve në platformat e akomodimit për fundjavën e koncertit dëshmon, ndikimin e drejtpërdrejtë ekonomik për familjet, bizneset dhe të ardhurat e pushtetit vendor e qendror.

“Mjafton të shihet shpërthimi i rezervimeve në booking.com për të premten, të shtunën e të dielën, për të krijuar një ide të përfitimit direkt ekonomik për familjet, biznesin dhe arkën e bashkisë e të shtetit, nga rritja e konsumit, pa llogaritur këtu fare përfitimin e shtrirë në kohë”, shkroi Rama.

Kryeministri kritikoi kundërshtarët e vendimit, duke i akuzuar se po manipulojnë opinionin publik përmes pretendimeve se fondet e përdorura për koncertin janë marrë në dëm të sektorit të shëndetësisë dhe pacientëve.

“Tani sorrat dhe korbat e kanaleve sociale, janë turrur me një furi glasash duke bërë llogarira perverse prej manipulatorësh të paskrupullt, e duke bërë sikur qajnë hallin e popullit dhe deri edhe të sëmurëve me kancer, që do mbeten pa ilaçe si pasojë e “koncertit privat”, siç e quajnë djallëzisht”, theksoi Rama.

“Por mjerë ky popull e mjerë çdo i sëmurë, po të mbeteshin në kthetrat e këtyre zabrahanëve digjitalë, të mbështetur me këtë rast nga duart e armiqve e dashakëqinjve të Shqipërisë, të cilët lëshojnë pa pushim helm në kanalet sociale përmes dhjetëra mijëra profilesh fallco, duke përfituar nga etja për pushtet dhe kokëboshësia e uzurpatorëve të protestës qytetare”, nënvizon Rama.

Rama theksoi se vetëm pak ditë më parë qeveria ka miratuar fonde shtesë prej 15 milionë eurosh për barnat e pacientëve me sëmundje onkologjike, 5 milionë euro për pajisje mjekësore, si edhe masa të tjera mbështetëse për personat me aftësi të kufizuara, fëmijët me aftësi të veçanta, programet për start-up-et, garancinë sovrane për bizneset dhe investime në zhvillimin urban e rural.

“U kujtoj të tërëve se vetëm pak ditë më parë, ne nxorëm 15 milionë Euro plus vetëm për ilaçet e të sëmurëve me kancer dhe 5 milionë për aparatura mjekësore; dyfishuam mbështetjen për personat me aftësi të kufizuar dhe mbështetëm kujdestarët e tyre; dyfishuam mbështetjen për fëmijët me aftësi të veçanta; dyfishuam financimin e Start Up-eve; dyfishuam garancinë sovrane për programin dyfisho biznesin tënd; financuam një paketë të tërë ekstra për zhvillimin urban e rural, mbrojtjen dhe të gjitha këto e të tjera akoma ishin në Aktin Normativ të fundqershorit, ku qershia mbi tortë ishte padyshim bonusi i pensionistëve”, u shpreh Rama.

Kryeministri akuzoi kundërshtarët e tij për përpjekje për të penguar zhvillimin e vendit.

“Tani çfarë duan sorrat dhe korbat që e privatizuan djallëzisht protestën qytetare të flamingove, duke i detyruar të shtegtojnë larg bulevardit? Shumë e thjeshtë: Duan të ndalin dhe kthejnë mbrapa Shqipërinë! Me dhunën e arbitraritetit, të sharjeve, të shpifjeve, të akuzave dhe kërcënimeve për këdo që mendon ndryshe prej tyre! Ta harrojnë! Shqipëria nuk ndalet dhe nuk ka asnjë shans të kthehet mbrapsht”, përfundoi Rama.