KOPENHAGË – Marrëveshja për Groenlandën pritet të nënshkruhet, Frederiksen hesht për përmbajtjen

KOPENHAGË,20 shtator /ATSH-DPA/ – Kryeministrja daneze Mette Frederiksen po vazhdon të mos japë detaje mbi një marrëveshje me Shtetet e Bashkuara të Amerikës pasi u njoftua një përparim në mosmarrëveshjen për Groenlandën.

Mediat daneze raportuan sot se marrëveshja mund të nënshkruhet gjatë javës së ardhshme.

Frederiksen deklaroi se do të flasë për përmbajtjen e marrëveshjes vetëm pasi ajo të jetë nënshkruar.

Ajo i bëri komentet përpara nisjes së saj drejt Nju Jorkut, ku do të marrë pjesë në Asamblenë e Përgjithshme të Kombeve të Bashkuara.

Kryeministrja daneze pranoi se ekziston interes i madh për detajet e marrëveshjes.

Në një intervistë për transmetuesin “TV 2”, ajo tha se as ajo dhe as kryeministri i Groenlandës, Jens-Frederik Nielsen, nuk do të nënshkruanin një marrëveshje nëse ajo nuk do të ishte e mirë për Groenlandën.

Presidenti amerikan Donald Trump njoftoi të premten se ishte arritur një përparim në mosmarrëveshjen që ka zgjatur prej muajsh.

Në një postim në platformën e tij Truth Social, presidenti Trump tha se palët kishin hyrë në një marrëveshje lidhur me të ardhmen e sigurisë së Groenlandës.

Qeveritë e Danimarkës dhe Groenlandës deklaruan më pas se një marrëveshje mund të nënshkruhej gjatë javës së ardhshme.

Jens-Frederik Nielsen, kryeministri i Groenlandës, pritet të udhëtojë sot gjithashtu drejt Nju Jorkut, sipas agjencisë daneze të lajmeve Ritzau.