Krasniqi: Buxheti për komunat është rritur 66%, Asociacioni të jetë zë i 38 komunave

Ministri i Pushtetit Lokal, Elbert Krasniqi, ka reaguar ndaj deklarimeve të kryetarit të Asociacionit të Komunave të Kosovës, Sazan Ibrahimi gjatë një interviste në Telegrafi, lidhur me financimin e komunave.

Krasniqi ka thënë se akuzat ndaj Qeverisë për financat e komunave nuk qëndrojnë, duke argumentuar se buxheti i ndarë për pushtetin lokal është rritur ndjeshëm gjatë viteve të fundit.

“Kur mungojnë faktet, mbeten vetëm akuzat. Kështu paska vepruar Sazan Ibrahimi, kryetari i Asociacionit të Komunave të Kosovës”, ka shkruar Krasniqi.

Ai ka përsëritur të dhënat e prezantuara më herët nga ministri i Financave, Hekuran Murati, sipas të cilave buxheti i ndarë për komunat ka qenë 546 milionë euro në vitin 2021, ndërsa në vitin 2027 pritet të arrijë në 907 milionë euro.

Sipas Krasniqit, kjo paraqet rritje prej 66 për qind.

Ministri ka kundërshtuar pretendimet se Qeveria “po ua merr paratë komunave”, duke thënë se mjetet e përmendura janë kthyer sërish në komuna përmes projekteve investuese.

“Këto mjete nuk u zhdukën dhe nuk u morën nga ministria. Ato përsëri u kthyen në komuna, përmes projekteve investuese që synojnë përmirësimin e drejtpërdrejtë të jetës së qytetarëve”, ka deklaruar Krasniqi.

Ai ka shpjeguar se, meqë bëhej fjalë kryesisht për komuna me kapacitete më të kufizuara administrative dhe njerëzore, ekzistonte rreziku që ato të mos arrinin t’i shpenzonin të gjitha fondet brenda afateve të përcaktuara.

Për këtë arsye, sipas tij, Qeveria ka vendosur që 25 për qind e mjeteve të mbetura të orientoheshin në një program tjetër investimesh, duke u mbështetur në legjislacionin për menaxhimin e financave publike.

Krasniqi ka kritikuar gjithashtu Asociacionin e Komunave të Kosovës, duke kërkuar që ai të përfaqësojë të gjitha komunat në mënyrë të barabartë.

“Asociacioni duhet të jetë zë i të gjitha komunave, jo t’i trajtojë komunat në mënyrë selektive. Interesat e komunave mbrohen me investime e projekte zhvillimore, jo me deklarata puro politike”, ka shkruar ai.

Në fund, Krasniqi ka theksuar se Asociacioni duhet të jetë përfaqësues i të gjitha 38 komunave të Kosovës.

“Asociacioni duhet të jetë zë i 38 komunave, jo zë selektiv i disa prej tyre”, ka përfunduar ministri./Telegrafi/