Kredia konsumatore u rrit me 12,4%

Banka e Shqipërisë bëri të ditur se në fund të muajit shkurt, kredia konsumatore u rrit me 12.4% krahasuar me të njëjtën periudhë të një viti më parë.

Portofoli i kredisë konsumatore të dhënë nga sistemi bankar ka vlerën e rreth 39 miliardë lekëve, ose afro 280 milionë eurove. Rritja e kredisë konsumatore po mbështetet nga ulja e ndjeshme e normave të interesit dhe nga fokusimi i bankave te kredia për individë.

Vlerat për kreditë konsumatore janë relativisht të ulëta dhe rrjedhimisht ekspozimi i bankës te klientët individualë është mesatarisht më i vogël. Kjo mundëson një diversifikim dhe shpërndarje të lartë të rrezikut kreditor. Përgjithësisht, këto kredi jepen te klientët pagamarrës në banka, çka mundëson një analizë dhe kontroll të mirë të debitorëve.