Kremlini: Putin është gati të flasë me BE-në, por nuk do të bëjë hapin e parë

Presidenti rus, Vladimir Putin është i gatshëm të negociojë me “të gjithë”, përfshirë evropianët, tha Kremlini të premten pasi Financial Times raportoi se udhëheqësit e Bashkimit Evropian po përgatiteshin për bisedime të mundshme.

FT raportoi të enjten se ndryshimi nga BE u nxit nga zhgënjimi evropian me negociatat për t’i dhënë fund luftës në Ukrainë, të cilat janë udhëhequr nga Presidenti i SHBA-së, Donald Trump.

Presidenti i Këshillit Evropian, Antonio Costa tha se besonte se kishte potencial që BE-ja të negocionte me Putinin dhe se blloku kishte mbështetjen e presidentit ukrainas Volodymyr Zelenskyy për ta bërë këtë.

“Putini është gati të negociojë me të gjithë. Ai e ka deklaruar vazhdimisht këtë”, u tha gazetarëve zëdhënësi i Kremlinit, Dmitry Peskov kur u pyet për raportin e FT nga Reuters.

“Ne do të jemi të gatshëm të ecim përpara me dialogun tonë për aq sa evropianët janë të gatshëm ta bëjnë këtë. Megjithatë, siç e ka deklaruar vazhdimisht Putini, ne nuk do të fillojmë kontakte të tilla pas qëndrimit të marrë nga evropianët”, shtoi ai.

Rusia thotë se u takon qeverive evropiane të bëjnë hapin e parë, pasi ato ishin ato që ndërprenë kontaktin me Moskën në vitin 2022 pas fillimit të luftës me Ukrainën.

“Pala ruse nuk ishte iniciatore e ndërprerjes së plotë të marrëdhënieve tona me BE-në. Kjo u iniciua nga Brukseli dhe kryeqytetet individuale evropiane”, tha Peskov.

Udhëheqësit evropianë kanë thënë se Rusia duhet të mposhtet në Ukrainë dhe e kanë cilësuar Putinin si kriminel lufte dhe autokrat, i cili, sipas tyre një ditë mund të sulmojë një anëtar të NATO-s nëse atij i lejohet të fitojë luftën. Rusia i hedh poshtë pretendime të tilla si të pakuptimta.