Kryeprokurori Olsian Çela në Komisionin e Ligjeve: Rritet numri i procedimeve penale, 76% i përkasin krimeve

Prokurori i Përgjithshëm Olsian Çela raportoi këtë të hënë në Komisionin e Ligjeve mbi veprimtarinë vjetore të institucionit dhe gjendjen e kriminalitetit për vitin 2025.

Gjatë raportit Çela paraqiti të dhëna që tregojnë një rritje të ngarkesës së punës dhe të procedimeve të trajtuara nga prokuroritë e juridiksionit të përgjithshëm.

Gjatë fjalës së tij, Çela vlerësoi angazhimin e prokurorëve dhe bashkëpunimin ndërinstitucional në luftën kundër kriminalitetit, duke theksuar se rezultatet e arritura janë produkt i profesionalizmit dhe koordinimit mes institucioneve ligjzbatuese.

Prokurori bëri me dije se gjatë vitit të kaluar organi i prokurorisë ka trajtuar gjithsej 66 mijë e 397 materiale në shqyrtim, duke shënuar një rritje prej 8.55 % krahasuar me vitin 2024. Po ashtu, ai sqaroi se janë ndjekur 50 mijë e 121 procedime penale, ose 5.35 % më shumë se një vit më parë. Nga këto, 27 mijë e 77 janë procedime penale të regjistruara rishtazi, me një rritje prej 8.5 % në raport me vitin 2024.

“Nga procedimet e trajtuara, 22 mijë e 860 janë procedime të mbartura nga periudhat e mëparshme, me një rritje prej 1.87 për qind, ndërsa 184 procedime penale janë rifilluar gjatë vitit 2025”, u shpreh Çela.

Në raport ishte edhe numri i referimeve dhe kallëzimeve penale për të cilat është vendosur mosfillimi i procedimit. Sipas Prokurorit të Përgjithshëm, gjatë vitit të kaluar janë regjistruar 16 mijë e 276 raste të tilla, duke shënuar një rritje prej 20 % krahasuar me vitin 2024.

“Prokuroria e Tiranës ka pasur numrin më të lartë të procedimeve, me 36.62 % të totalit. Pas saj renditet Prokuroria e Durrësit me 9.5 %, ndërsa Shkodra, Korça, Vlora dhe Fieri përfaqësojnë secila rreth 7 % të procedimeve të regjistruara. Numrin më të ulët të procedimeve e kanë pasur Kukësi dhe Dibra, përkatësisht me 2.45 % dhe 2.38 % të totalit. Koeficienti i kriminalitetit për procedimet e regjistruara për 100 mijë banorë në vitin 2025 ka qenë 1.145, ndërsa në vitin 2024 ky koeficient ishte 1.037”, deklaroi Çela.