Lëvizja e Socialistëve e Aleksandar Vulinit distancion veten nga kriza në lëvizjen e Nestoroviçit: “Nuk duam të jemi shkak i çarjes”

Lëvizja e Socialistëve (PS), e drejtuar nga Aleksandar Vulin, ka deklaruar sot se nuk dëshiron të jetë shkak i një çarjeje në lëvizjen “MI – fuqia e popullit” të Branimir Nestoroviçit dhe as pjesë e llogarive të brendshme aty. Në një deklaratë të publikuar në faqen e saj zyrtare, PS-ja konfirmon se ka zhvilluar bisedime me Nestoroviçin dhe me udhëheqjen e lëvizjes së tij për një dalje të përbashkët në zgjedhjet parlamentare të 25 tetorit.

“Nuk duam të jemi arsye për rrezikimin e shëndetit të Nestoroviçit dhe as shkak për çarje në radhët e tyre”, thuhet në deklaratë. Socialistët njoftojnë se do të vendosin më vonë nëse dhe si do të dalin në zgjedhje apo do të mbështesin ndonjë listë, por theksojnë se nuk do t’i ndryshojnë kurrë idetë dhe qëndrimet e tyre.

Veten e quajnë “e majta kombëtarisht e përgjegjshme” që, sipas tyre, nuk i ka ndryshuar kurrë qëndrimet: janë për “botën serbe dhe bashkimin e serbëve në një shtet”, për një shoqëri të drejtësisë sociale, për aleancë me Rusinë dhe Kinën dhe kundër çdo integrimi në BE dhe NATO. “Kjo është arsyeja pse nuk kemi qenë në qeverinë aktuale të Serbisë dhe pse nuk jemi pjesë e listës së koalicionit qeverisës, por edhe arsyeja pse nuk mundemi dhe nuk do ta mbështesim Listën Studentore”, shtohet në deklaratë.

Deklarata vjen pas një dite të tensionuar në lëvizjen e Nestoroviçit. Më herët sot, anëtari i kryesisë Borislav Antonijeviç deklaroi se në një mbledhje të jashtëzakonshme të Kuvendit të lëvizjes është votuar në mënyrë të paligjshme dhe jo-legjitime shkarkimi i anëtarëve të kryesisë që kundërshtojnë koalicionin me PS-në, pa u marrë ndonjë vendim për hyrjen në këtë koalicion. Vetë Nestoroviçi u shfaq në mbledhje i shoqëruar, sipas pretendimeve, nga rreth 80 banorë të lagjes “Çaçilend” të sjellë me autobusë, të cilët votuan për koalicionin me Vulinin.

Burimi: Nova.rs