Mali i Zi përgatit Kornizën Kombëtare të Politikës për infrastrukturën e karburanteve alternative: energjetika dhe transporti planifikohen bashkë

Zhvillimi i infrastrukturës për karburantet alternative kërkon që sektorët e transportit dhe të energjetikës të planifikohen së bashku, jo secili më vete. Ky ishte mesazhi kryesor i punëtorisë së organizuar nga Ministria e Transportit dhe Ministria e Energjisë dhe Minierave e Malit të Zi, në kuadër të hartimit të Kornizës së parë Kombëtare të Politikës për infrastrukturën e karburanteve alternative.

Drejtoresha e përgjithshme në Ministrinë e Energjisë dhe Minierave, Zorana Sekuliq, theksoi se politika energjetike dhe ajo e transportit duhet të planifikohen integralisht. Sipas saj, vetëm përmes planifikimit të përbashkët mund të garantohet që infrastruktura e karikimit dhe e furnizimit me karburante alternative të funksionojë në mënyrë efikase dhe të qëndrueshme.

Punëtoria u zhvillua si pjesë e një projekti të financuar nga Bashkimi Evropian, në kuadër të të cilit Mali i Zi po harton Kornizën e parë Kombëtare të Politikës për infrastrukturën e karburanteve alternative. Gjatë diskutimeve u theksua nevoja që operatori i shpërndarjes së energjisë elektrike, CEDIS, të përfshihet që në fazën e hershme të planifikimit, në mënyrë që rrjeti të jetë i përgatitur për ngarkesat e reja që do të sjellë elektromobiliteti.

Nga punëtoria rezultoi se Mali i Zi tashmë disponon një numër karikuesish elektrikë, por ata nuk janë të mjaftueshëm në fuqi dhe nuk ndjekin korridoret kryesore të transportit. U vlerësua se nevojitet të paktën një karikues në çdo 60 kilometra dhe u identifikuan 14 lokacione karikimi përgjatë korridoreve kryesore të vendit.

Objektivi që Mali i Zi i ka vënë vetes është që deri në vitin 2030, 24,4 për qind e energjisë së konsumuar në transport të vijë nga burimet e rinovueshme, nga vetëm 1,5 për qind që ishte në vitin 2022. Drejtimet realiste për arritjen e këtij synimi janë biokarburantet dhe elektromobiliteti, ndërsa hidrogjeni shihet si zgjidhje për transportin e rëndë.

Burimi: RTCG