Mali: Pensionet po paguhen sipas planit, financat publike janë të qëndrueshme

Ministri i Financave në mandat teknik, Siniša Mali, ka deklaruar sot se pagesa e pensioneve ka nisur sipas planit dhe se financat publike mbeten të qëndrueshme, ndaj qytetarët nuk duhet të shqetësohen, siç njofton NS Uživo, duke cituar deklaratën e tij për agjencinë Tanjug.

Sipas tij, dje u paguan pensionet për kategorinë e të vetëpunësuarve. Nesër paguhen pensionet për bujqit dhe pensionistët ushtarakë, ndërsa më 10 të këtij muaji pagesa bëhet për kategorinë më të madhe, atë të të punësuarve.

Nesër paguhet edhe pjesa e parë e pagave të tetorit për të punësuarit në administratën publike, ndërsa pjesa e dytë do të paguhet më 20 nëntor.

Mali bëri të ditur se nga 1 dhjetori, sipas formulës zvicerane, pensionet rriten me 7,5 për qind. Pagat në administratën publike rriten me 8 për qind për të gjithë dhe me 12 për qind për të punësuarit në mbrojtjen sociale, ndërsa në llogarinë e buxhetit, sipas tij, ka mbi 400 miliardë dinarë.

Ndërkohë, Banka Poštanska štedionica, në bashkëpunim me Fondin Republikan të Sigurimit Pensional dhe Invalidor dhe me pëlqimin e Bankës Kombëtare të Serbisë, nisi dje pagesën njëherëshe të pensioneve për përdoruesit e kategorisë së të vetëpunësuarve që pensionin e merrnin më parë përmes Alta Bankës. Fondi njoftoi se banka do t’u hapë atyre llogari të përkohshme.