Manovra të rrezikshme me gomone në Vlorë, drejtuesi në gjendje të dehur gjobitet me 50 mijë lekë

Një drejtues gomoneje është ndëshkuar nga Policia Kufitare pasi u kap duke lëvizur me shpejtësi të lartë dhe duke kryer manovra të rrezikshme në zonën e Triportit.

Shërbimet e Policisë Kufitare dhe të Njësisë Policore Detare, gjatë kontrolleve pranë zonës së ankorimit të mjeteve lundruese në Triport, konstatuan një gomone që lëvizte me shpejtësi të madhe dhe kryente manovra të rrezikshme.

Sipas Policisë, sjellja e drejtuesit rrezikonte sigurinë e mjeteve të tjera lundruese, por edhe të pushuesve që ndodheshin në zonë.

Shërbimet ndërhynë menjëherë dhe ndaluan mjetin lundrues. Drejtuesi, shtetasi A. G., iu nënshtrua testit të alkoolit, i cili rezultoi pozitiv, duke konstatuar se ai drejtonte gomonen në gjendje të dehur.

Në përfundim të veprimeve procedurale, ndaj drejtuesit u vendos një gjobë prej 50 mijë lekësh të rinj, ndërsa leja e drejtimit iu bllokua për një periudhë 2-mujore. Gjithashtu, autoritetet bllokuan edhe mjetin lundrues.

Policia Kufitare u ka bërë apel drejtuesve të mjeteve lundruese që të respektojnë me rigorozitet rregullat e lundrimit dhe të shmangin shpejtësinë e lartë apo çdo manovër që mund të rrezikojë jetën e personave dhe sigurinë e mjeteve në det.

Kontrollet në zonat bregdetare vijojnë me qëllim garantimin e sigurisë së pushuesve dhe të mjeteve lundruese.