Marinika Tepiq: Prokurori i posaçëm antikorrupsion do të mund të urdhërojë arrestimin e presidentit dhe kryeministrit

Marinika Tepiq, një nga bartësit e listës zgjedhore “Evropska Srbija” dhe nënkryetare e Partisë së Lirisë dhe Drejtësisë (SSP), prezantoi sot ligjin për Prokurorin e Posaçëm për korrupsionin e zyrtarëve publikë.

Sipas saj, prokurori i posaçëm do të ketë autorizimin të zhvillojë një hetim plotësisht të pavarur përmes policisë së vet hetimore dhe, nëse ka prova, të urdhërojë arrestimin e çdo drejtori, ministri, kryeministri e deri të presidentit të shtetit.

“Në Serbi nuk duhet të ekzistojë më asnjë funksion që e mbron njeriun nga ligji… ky prokuror nuk do t’i përgjigjet as presidentit, as kryeministrit, as ministrit e as ndonjë shefi partie, por vetëm ligjit”, deklaroi Tepiq.

“Nëse presidenti i Republikës vjedh ose abuzon me postin, pasojnë hetimi, provat dhe arrestimi. Nëse kryeministri merr ryshfet — hetim, prova dhe arrestim. Nëse ministri u rregullon punë njerëzve të vet dhe parazitëve partiakë — hetim, prova dhe arrestim”, shtoi ajo.

Tepiq theksoi se nuk bëhet fjalë për revanshizëm, por funksioni nuk do të jetë më mburojë: “Mjaft më me një shtet ku ligji vlen për njeriun e thjeshtë, por jo për pushtetin… Nuk do të ketë të mbrojtur. Nuk do të ketë të paprekshëm. Nuk do të ketë imunitet partiak nga drejtësia.”

Burimi: Nova.rs