Mbledhja e BERZH- Sejko, takime me personalitetet e fushës financiare

Banka Evropiane për Rindërtim dhe Zhvillim (BERZH) në Londër zhvilloi takimin vjetor me temë “Të influencojmë ndryshimin – 25 vitet në vijim”, ku ishte i pranishëm edhe Guvernatori i Bankës së Shqipërisë, Gent Sejko.
Në kuadër të pjesëmarrjes në këtë mbledhje, zyra e shtypit e BSH-së njoftoi se Guvernatori Sejko zhvilloi disa takime të rëndësishme me personalitetet më të njohura të fushës financiare ndërkombëtare.

Gjatë takimeve, Sejko i njohu të pranishmit me zhvillimet më të fundit në ekonominë shqiptare, duke u ndalur në perspektivën e rritjes ekonomike, si dhe në zhvillimet e sektorit bankar.

Guvernatori falënderoi përfaqësuesit e BERZH-it për kontributin e rëndësishëm dhe mbështetjen konkrete me investime financiare në fusha kyçe të ekonomisë së vendit tonë dhe i ftoi të vazhdojnë të vlerësojnë potencialet që ofron Shqipëria.

Referuar njoftimit zyrtar, duke vlerësuar rolin dhe kontributin e Bankës së Shqipërisë në ruajtjen e stabilitetit makroekonomik të vendit, përfaqësuesit e BERZH-it falënderuan Guvernatorin për bashkëpunimin e deritanishëm institucional si dhe diskutuan lidhur me projektet e ardhshme në fushën e sistemit financiar dhe më gjerë. Philip Bennet, Zëvendëspresident i Parë dhe Drejtori Kryesor Operacional i BERZH-it, vlerësoi potencialet e vendit dhe shprehu angazhimin për rritjen e bashkëpunimit në fusha me interes të veçantë për Shqipërinë si energjia, agroindustria, etj.

Në përfundim, Guvernatori Sejko ndoqi dhe punimet e tryezës së Ministrave të Financave të Ballkanit Perëndimor me temë “Ballkani Perëndimor si një destinacion investimi – Perspektiva Rajonale”, ku Shqipëria u përfaqësua nga zëvëndësministri i Financave, Erjon Luçi