Mediat palestineze: Ja çfarë përfshin plani për fazën e dytë të armëpushimit në Gaza

Një plan veprimi për zbatimin e fazës së dytë të marrëveshjes së armëpushimit në Gaza përfshin çështje kyçe si qeverisja e enklavës, çarmatimi i grupeve të armatosura, e ardhmja e strukturave të sigurisë, tërheqja graduale e ushtrisë izraelite dhe rindërtimi i territorit, sipas burimeve palestineze.

Presidenti i SHBA-së Donald Trump njoftoi më herët se ishte arritur një marrëveshje për çarmatimin e plotë të Hamasit dhe grupeve të tjera të armatosura në Gaza, ndërsa forcat izraelite do të tërhiqen gradualisht në varësi të përparimit të zbatimit të marrëveshjes.

Trump falënderoi Egjiptin, Katarin dhe Turqinë për rolin e tyre ndërmjetësues, duke e cilësuar marrëveshjen si një “përparim historik”. Sipas tij, procesi do të zhvillohet në faza, me përfshirjen e një force ndërkombëtare stabilizimi dhe një force të re policore palestineze që do të marrë përgjegjësinë për sigurinë në Gaza.

Sipas mediave palestineze, zbatimi i planit do të nisë brenda 14 ditëve pas miratimit nga të gjitha palët përkatëse. Ata thanë se fillimisht kërkohet ndërprerja e plotë e operacioneve ushtarake dhe zbatimi i masave humanitare të parashikuara në marrëveshjen e armëpushimit.

Plani parashikon gjithashtu transferimin gradual të përgjegjësive civile dhe të sigurisë te Komiteti Kombëtar për Administrimin e Gazës gjatë një periudhe kalimtare. Ky organ do të mbikëqyrë institucionet dhe shërbimet publike, si dhe do të kryejë një rishikim të gjerë financiar dhe administrativ të enklavës.

Ata theksuan se drafti përfshin edhe krijimin e një force ndërkombëtare stabilizimi, e cila do të punojë së bashku me strukturat e reja të sigurisë në kuadër të fazës së pasluftës në Gaza.