Mijëra qytetarë për të 14-ën ditë me radhë para Kryeministrisë, protestuesit nuk ndalen: “Rama, jepe dorëheqjen”

Tiranë – Protesta qytetare kundër qeverisë ka hyrë sot në ditën e 14-të radhazi, ndërsa mijëra qytetarë janë mbledhur para godinës së Kryeministrisë për të kërkuar dorëheqjen e kryeministrit Edi Rama.

Bulevardi “Dëshmorët e Kombit” është mbushur me protestues të ardhur nga Tirana, rrethet e vendit dhe diaspora shqiptare, të cilët i janë bashkuar tubimit me pankarta, flamuj kombëtarë dhe thirrje kundër qeverisë. Në qendër të protestës mbetet kërkesa për largimin e kryeministrit, të cilën pjesëmarrësit e cilësojnë si të panegociueshme.

Gjatë protestës po mbahen fjalime nga qytetarë dhe përfaqësues të grupeve të ndryshme pjesëmarrëse, të cilët kanë shprehur pakënaqësitë e tyre për gjendjen politike, ekonomike dhe sociale në vend. Thirrjet “Rama, jepe dorëheqjen” dhe “Shqipëria e shqiptarëve” kanë dominuar atmosferën përgjatë gjithë tubimit.

Pjesëmarrësit kanë deklaruar se protesta do të vazhdojë edhe në ditët në vijim dhe se nuk do të tërhiqen deri në realizimin e kërkesave të tyre. Sipas tyre, lëvizja qytetare ka fituar mbështetje të gjerë si brenda vendit ashtu edhe në komunitetet shqiptare jashtë Shqipërisë.

Edhe në këtë ditë të 14-të, prania e protestuesve ka qenë e konsiderueshme, ndërsa bulevardi kryesor i kryeqytetit është mbushur me qytetarë që kërkojnë ndryshim politik dhe largimin e qeverisë aktuale.

Tubimi po vijon para Kryeministrisë, ku protestuesit kanë bërë të qartë se do të vazhdojnë qëndresën e tyre deri në plotësimin e kërkesës për dorëheqjen e kryeministrit Edi Rama.