Mungesa e instrumenteve muzikore në shkollat në Tiranë, pengesë për edukimin muzikor

Instrumentet muzikore në shkolla janë një domosdoshmëri për edukimin muzikor, por sot mungojnë në shumicën e tyre. Problemi i mungesës së instrumenteve muzikore në shkolla, si dhe një sërë çështjesh të tjera me në fokus lëndën e muzikës u trajtuan në tryezën e rrumbullakët “Muzika -Mësuesit dhe nxënësit” në Universitetin e Arteve në Tiranë. Në përfundim të praktikës mësimore të studentëve të programeve “Kompozicion dhe Mësuesi”, “Dirigjim dhe Mësuesi” dhe “Pedagogji Muzikore” (Bachelor dhe Master), këto ditë në Lektoriumin e Fakultetit të Muzikës u zhvillua tryeza e rrumbullakët me temë “Muzika- Mësuesit dhe nxënësit”. Nën drejtimin e pedagogëve Prof. As. Dr. Manjola Tërshana dhe Prof. As. Dr. Holta Sina, studentët referuan mbi përvojën e tyre gjatë zhvillimit të praktikës mësimore në lëndën e muzikës, në disa shkolla 9-vjeçare dhe të mesme të qytetit të Tiranës. Sipas Universitetit të Arteve në Tiranë, gjatë kësaj tryeze u hodhën ide dhe propozime për forcimin e rolit të lëndës së muzikës në shkolla.

“Gjatë tryezës, studentët pjesëmarrës hodhën ide të vlefshme për ta konsideruar lëndën e muzikës jo thjesht si një lëndë të kurrikulës shkollore, por për t’i dhënë vendin që i takon si kontribuese e rëndësishme në formimin e qytetarëve të ardhshëm. Për të arritur këtë qëllim, sfidat janë të shumta. U ngritën probleme të cilat kërkojnë të dëgjohen dhe të gjejnë rrugën e zgjidhjes. Veçanërisht u vu theksi tek domosdoshmëria që shkollat tona të jenë të pajisura me të paktën një instrument muzikor, diçka që aktualisht mungon në shumicën e shkollave të qytetit të Tiranës”, thuhet nga Universiteti i Arteve. Një risi e këtij viti ishte edhe pjesëmarrja e disa studentëve në projektin “Eja, këndо me ne”. Sipas UA-së u diskutua për vështirësitë, por edhe për rezultatet e mira të arritura në këtë drejtim. Tryeza e rrumbullakët “Muzika -Mësuesit dhe nxënësit” e zhvilluar së fundmi ofroi mundësinë për të diskutuar sfidat e edukimit muzikor në shkolla, ndërsa vjen në vijim dhe të tjera veprimtarive që zhvillohen në Universitetin e Arteve, ku pjesëmarrës janë studentë dhe pedagogë të arteve.

Zhvillimi i praktikave mësimore

Universiteti i Arteve, në bashkëpunim me Drejtorinë Arsimore të qytetit të Tiranës, nëpërmjet zhvillimit të praktikave mësimore mundëson përgatitjen e mësuesve të rinj me vizion të ri dhe profesional. Ndërsa struktura e Fakultetit të Muzikës në këtë universitet është e organizuar në tre departamente: Departamenti i Interpretimit (DI), me programet e studimit Piano, Harqe, Fizarmonikë Klasike, Kitarë, Instrumente Frymore. Departamenti Kompozicion – Muzikologji – Dirigjim – Pedagogji (KMDP), me programet e studimit Kompozicion, Muzikologji, Dirigjim dhe Pedagogji Muzikore.