MUNGESA E OPOZITËS NË KUVEND, MBETET PA VOTIM ZGJEDHJA E DY ANËTARËVE TË KËSHILLIT GJYQËSOR

_{Foto: Kuvendi i Malit të Zi / Skupština Crne Gore}

Kuvendi i Malit të Zi nuk arriti të votojë për dy kandidatët e mbetur për Këshillin Gjyqësor, pasi shumica e deputetëve të opozitës u larguan nga salla, duke pamundësuar sigurimin e shumicës prej dy të tretash të nevojshme për zgjedhjen e tyre.

Nga tre kandidatët e propozuar, mbështetjen e deputetëve e mori vetëm Mersudin Dautoviq, ndërsa votimi për Darko Hajdukoviqin dhe Kllaudija Pejoviqin u shty.

Në seancën e sotme, deputetët diskutuan edhe ndryshimet e Ligjit për të Huajt, të cilat, sipas Ministrisë së Punëve të Brendshme, synojnë përmbushjen e kritereve për mbylljen e Kapitullit 24 në negociatat me Bashkimin Evropian.

Gjatë debatit, përfaqësuesit e shumicës kërkuan kontrolle më të rrepta për shtetasit e huaj që hyjnë në Mal të Zi, ndërsa pati edhe akuza politike lidhur me vendimet për lejimin ose ndalimin e hyrjes së personave të caktuar në vend.

Në rend dite pritet të jetë edhe shqyrtimi i ndryshimeve kushtetuese për verifikimin e integritetit të zyrtarëve të lartë të pushtetit ekzekutiv, ndaj të cilave opozita ka shprehur rezerva.