Nuredin Dumani godet me grusht gardianin e burgut

Një incident është regjistruar në ambientet e paraburgimit “313” në Tiranë, ku i paraburgosuri Nuredin Dumani dyshohet se është përfshirë në një përplasje fizike me një punonjës të policisë.

Ngjarja raportohet të ketë ndodhur në mesin e muajit gusht 2026, në sektorin e sigurisë së lartë të paraburgimit, ku mbahen persona të përfshirë në procese të rëndësishme penale.

Sipas informacioneve paraprake, konflikti ka ndodhur mes Nuredin Dumanit dhe punonjësit të Drejtorisë së Mbrojtjes së Dëshmitarëve, Rexhep Sina, i cili dyshohet se është goditur me grusht gjatë përplasjes.

Pas incidentit, punonjësi i policisë raportohet se ka bërë kallëzim pranë strukturave të Policisë së Burgjeve. Në vijim, Prokuroria e Tiranës ka regjistruar një procedim penal, ku dyshohet se po hetohen veprat penale “Goditja për shkak të detyrës” dhe “Kanosja për shkak të detyrës”.

Sipas të dhënave paraprake, Rexhep Sina ishte ngarkuar me detyrën e garantimit të sigurisë fizike të Dumanit, i cili është bashkëpunëtor i drejtësisë.

Deri në këto momente, nuk janë bërë të ditura zyrtarisht motivet që kanë çuar në përplasjen mes tyre.

Hetimet vijojnë për zbardhjen e plotë të rrethanave dhe dinamikës së incidentit.