Operacion antiterror në Greqi! Mitsotakis: Do t’i japim fund problemit të terrorizmit të brendshëm

Prokuroria e Athinës ka dhënë akuzat për tre akte kriminale terroriste dhe pesë shkelje të kodit penal për dy prej tre terroristëve që janë arrestuar disa orë më parë nga Shërbimi i Antiterrorit grek në kryeqytet.

Bëhet fjalë për dy burra të moshës 41 dhe 45-vjeçare, anëtarë të organizatës terroriste “Vetëmbrojtja Revolucionare” , ndërsa po hetohet edhe një grua 39 vjeçe.

Arrestimi i tyre është kryer në një shtëpi në lagjen periferike Holargo, aty ku autoritetet kanë gjetur dhe kanë konfiskuar 5 armë të tipit kallashnikov, një armë automatike, 4 granata dore, 2 pistoleta, 17 detonatorë (9 prej tyre me telekomandë) dhe eksplozivë të ndryshëm.

Një ekzaminim balistik identifikoi se një prej kallashnikovëve është përdorur në një prej sulmeve për të cilat ka marrë përgjegjësinë grupi terrorist dhe e njëjta arme u përdor në një vjedhje të një dyqani lojrash, pas së cilës ranë nën pranga tre prej anëtarëve të grupit.

“Dua të uroj Shërbimin e Antiterrorizmit , Policinë  dhe Ministrinë e Mbrojtjes së Qytetarëve për suksesin e tyre të madh. Unë do të doja të përsëris edhe një herë angazhimin tim se do t’i japim një herë e përgjithmonë fund problemit të terrorizmit të brendshëm”, u shpreh Kyriakos Mitsotakis, kryeministër i Greqisë.

Sipas policisë greke “Vetëmbrojtja Revolucionare”  ka  marrë përgjegjësinë për dy sulme me armë tek selia e PASOK-ut  në qendër të Athinës në 2014 dhe 2017 si dhe për sulmet ndaj ambasadave të Meksikës dhe Francës në gusht dhe nëntor të 2016 ku eshte plagosur edhe nje polic.

Në operacionin policor që filloi diten e premte dhe është ende në zhvillim janë shoqeruar për t’u pyetur në hetuesi mbi 15 persona, ndërsa është shpallur në kerkim edhe një 46-vjeçar.