Pakistani kërkon ringjalljen e marrëveshjes së Islamabadit për ri-hapjen e Ngushticës së Hormuzit

Zëvendëskryeministri dhe ministri i Jashtëm i Pakistanit, Mohammad Ishaq Dar, zhvilloi një bisedë telefonike me drejtorin e përgjithshëm të Agjencisë Ndërkombëtare të Energjisë Atomike (IAEA), Rafael Grossi, për “situatën rajonale në zhvillim” dhe riaktivizimin e Memorandumit të Islamabadit, njoftoi Ministria e Jashtme pakistaneze.

Memorandumi i 17 qershorit duhej të niste një periudhë 60-ditore për bisedimet e paqes mes Iranit dhe SHBA-së dhe parashikonte ri-hapjen e Ngushticës së Hormuzit, e cila është bërë një nga pikat më të nxehta të luftës. Megjithatë, marrëveshja skadoi në mesin e gushtit mes akuzash të ndërsjella për mos-zbatim.

Të dy zyrtarët “ranë dakord se zbatimi i memorandumit të Islamabadit mbetet rruga më e mirë për të zbutur tensionet”, me Grossin që ofroi mbështetjen teknike të nevojshme për zbatimin e tij. Ndërmjetësit rajonalë si Pakistani dhe Katari kanë tentuar të ringjallin diskutimet, por zbatimi mbetet i ngrirë, ndërsa Irani e mban Hormuzin të kufizuar në pritje të angazhimeve të reja nga SHBA-ja.

Dar “ripohoi angazhimin e palëkundur të Pakistanit për qëllimet dhe parimet e Kartës së OKB-së dhe respektimin e së drejtës dhe traktateve ndërkombëtare”, thuhet në deklaratë. Nga ana tjetër, Teherani ka hedhur poshtë sinjalet e presidentit Trump për bisedime, duke deklaruar se “s’ka bisedime derisa të plotësohen kushtet e Iranit”.

Burimi: Al Jazeera