Pamer: Maqedonia e Veriut do të marrë 140 milionë euro përmes Planit të Rritjes së BE-së

Maqedonia e Veriut do të përfitojë 140 milionë euro në kuadër të Planit të Rritjes (Growth Plan) të Bashkimit Europian. Lajmi u bë i ditur nga ambasadori austriak në vend, Martin Pamer, sipas portalit Skopje info.

Pamer vlerësoi punën e institucioneve maqedonase në zbatimin e reformave, duke deklaruar se “Maqedonia e Veriut bëri punë të shkëlqyer në lidhje me Planin e Rritjes”. Sipas tij, vendi ka arritur të përmbushë me sukses një pjesë të masave reformuese të parashikuara, duke hapur rrugën për lëshimin e fondeve europiane.

Plani i Rritjes është instrumenti i BE-së i dedikuar Ballkanit Perëndimor, i cili i lidh fondet europiane drejtpërdrejt me zbatimin e reformave nga vendet e rajonit. Nëpërmjet këtij mekanizmi, pagesat nga Brukseli lëshohen gradualisht, sipas përmbushjes së hapave reformues të përcaktuara.

Mbështetja prej 140 milionë eurosh konsiderohet si një sinjal i fortë pozitiv për rrugëtimin europian të Maqedonisë së Veriut, ndërsa fondet e tjera të planifikuara pritet të lëshohen në vijim, në përputhje me progresin e reformave.

Burimi: Skopje info