Paqja fiskale, kush përfiton dhe çfarë shmang biznesi

Ka nisur zbatimi i marrëveshjes së paqes fiskale, një mekanizëm që u jep mundësi bizneseve dhe individëve të korrigjojnë deklarimet financiare dhe tatimore për vitet e kaluara, përmes një procedure të posaçme në administratën tatimore.

Aplikimet janë hapur më 15 maj dhe do të pranohen deri më 5 qershor 2026. Procesi kryhet online përmes sistemit e-filing dhe përfshin rideklarimin e pasqyrave financiare apo deklaratave tatimore për vitet 2023, 2024 dhe 2025.

“Çdo tatimpagues që plotëson kriteret ligjore ka mundësi të aplikojë për lidhjen e marrëveshjes së paqes fiskale. Procesi është tërësisht elektronik dhe zhvillohet nëpërmjet sistemit e-filing, ku subjekti paraqet kërkesën dhe dokumentacionin përkatës për rideklarimin e të dhënave financiare apo tatimore”, tha drejtuesja e Drejtorisë së Procesit të Biznesit, Rozana Çelmeta.

Një nga përfitimet kryesore për subjektet që lidhin marrëveshjen është shmangia e kontrolleve të zakonshme tatimore.

“Tatimpaguesit që bëhen pjesë e paqes fiskale dhe respektojnë kushtet e marrëveshjes nuk do t’i nënshtrohen kontrolleve fizike tatimore për periudhat që përfshihen në marrëveshje. Përjashtim bëjnë vetëm rastet kur ka indicie për mashtrim me TVSH-në apo dyshime për pastrim parash”, shtoi Çelmeta.

Administrata Tatimore sqaron se kjo mundësi nuk është e kufizuar.

“Ligji parashikon që çdo subjekt mund të përfitojë deri në tre herë nga ky mekanizëm përjashtimi, nëse plotëson kriteret dhe procedurat e përcaktuara. Qëllimi është të inkurajohet vetëkorrigjimi dhe formalizimi vullnetar i aktivitetit ekonomik”, përfundoi Çelmeta.

Pas miratimit të marrëveshjes, subjektet duhet të dorëzojnë dokumentacionin e korrigjuar dhe të kryejnë pagesat përkatëse deri më 30 qershor 2026.

Tv Klan

/tvklan.al