Policia Rrugore aksion në Vlorë gjatë festimeve të maturantëve, kontrolle në rrugë

Policia Rrugore e Vlorës ka zhvilluar një aksion kontrolli në zonën e Skelës, duke monitoruar automjetet që qarkullonin në qytet, kryesisht ato të drejtuara nga të rinj të gjimnazeve që po festonin përfundimin e vitit shkollor.

Kontrollet janë fokusuar në parandalimin e situatave të rrezikshme në rrugë dhe në ndërgjegjësimin e të rinjve për respektimin e rregullave të qarkullimit rrugor.

Gjatë aksionit, efektivët e policisë kanë këshilluar maturantët dhe drejtuesit e mjeteve që të shmangin daljen nga dritaret e automjeteve apo veprime të tjera të rrezikshme, të cilat mund të bëhen shkak për aksidente.

Në krye të operacionit ka qenë shefja e Qarkullimit Rrugor në Vlorë, e shoqëruar nga dhjetëra efektivë policie, të cilët kanë patrulluar në zonat më të frekuentuara të qytetit.

Policia Rrugore ka apeluar për më shumë kujdes dhe përgjegjshmëri gjatë festimeve, me qëllim garantimin e sigurisë së të rinjve dhe të përdoruesve të tjerë të rrugës.