Poroshenko: Rusia të angazhohet me vepra, jo me fjalë

Presidenti i Ukrainës Petro Poroshenko i bëri dje thirrje Rusisë të mbështesë planin e tij për paqe në lindje të vendit “me vepra, jo me fjalë,” duke e akuzuar Moskën për agresion.

Në komentet para Asamblesë Parlamentare të Këshillit të Evropës në Strasburg, zoti Poroshenko, i cili ka paraqitur një plan për të zgjidhur konfliktin mes Kievit dhe separatistëve pro-rusë, i bëri thirrje Presidentit Vladimir Putin, i cili ka thënë se e mbështet planin, ta mbështesë atë me vepra dhe jo me fjalë.

Presidenti Poroshenko akuzoi Rusinë se po zhvillon një “luftë të pashpallur” kundër Ukrainës duke mbështetur dhe armatosur separatistët. Ai e cilësoi Rusinë “agresore” që ka shkatërruar stabilitetin rajonal.

Ai tha gjithashtu se nëse Rusia nuk kthen Krimenë, normalizimi i marrëdhënieve dypalëshe do të jetë i pamundur.

Më herët dje, Sekretari i Shtetit John Kerry tha se ka rëndësi kritike që brenda orëve të ardhshme Rusia t’u bëjë thirrje separatistëve në Ukrainën lindore të çarmatosen.

Ai i bëri komentet pas një takimi me homologun francez Laurent Fabius në Paris. Zoti Kerry tha se ai dhe ministri i jashtëm francez janë plotësisht të një mendjeje se Presidenti Putin duhet të dëshmojë që Rusia po punon për të bindur separatistët të ulin armët dhe të përfshihen në një proces të përligjshëm drejt paqes.