Prishtina po vazhdon me ritëm të lartë në Superligën e Kosovës, duke regjistruar edhe fitoren e radhës, kësaj here ndaj Gjilanit në udhëtim, me rezultat 2:1.

Ndeshja e zhvilluar në kuadër të xhiros së shtatë të elitës së futbollit kosovar i takoi skuadrës kryeqytetase, e cila vazhdon të mbajë kreun e tabelës.

Arjanit Fazlija e zhbllokoi rezultatin në minutën e 29-të, duke i dhënë epërsinë Prishtinës. Megjithatë, Gjilani reagoi shpejt dhe vetëm pesë minuta më vonë Lorik Boshnjaku realizoi për barazimin e shifrave, 1:1.

Në pjesën e dytë, Prishtina riktheu epërsinë përmes Anio Poçit, i cili në minutën e 66-të shënoi golin e dytë për skuadrën mysafire.

Prishtina e përfundoi ndeshjen me dhjetë futbollistë, pasi Djordje Saletic u përjashtua nga loja në minutën e 84-t pas kartonit të dytë të verdhë.

Me këtë fitore, Prishtina regjistron gjashtë fitore në po aq ndeshje të zhvilluara, duke grumbulluar 18 pikë dhe duke kryesuar tabelën. Skuadra kryeqytetase ka edhe një ndeshje më pak të zhvilluar.

Në anën tjetër, Gjilani pësoi humbjen e dytë të sezonit. Pas shtatë ndeshjeve, skuadra gjilanase ka tri fitore, dy barazime dhe dy humbje, duke u renditur në pozitën e katërt me 11 pikë.