Prishtinë, lirohet nga arresti Molliqaj, burri i Ministres se Arsimit, Besa Shahini

Dardan Molliqaj, deputeti i Kuvendit të Kosovës nga radhët e PSD-së, u lirua të hënën pas një arrestimi disa orësh nga policia. Lajmi u bë i ditur për mediat nga kryeprokurori në Prokurorinë Themelore të Prishtinës, Imer Beka. Zoti Molliqaj u vu nën pranga pasi ai kishte refuzuar ftesat për t’u paraqitur për intervistim në prokurori. Ai akuzohej për një sulm ndaj një personi zyrtar gjatë një proteste kohë më parë. “Molliqaj ka pasur urdhër që të paraqiten në prokurori për të dhënë deklaratë për një sulm që ai dyshohet se e kishte kryer ndaj një personi zyrtar kohë më parë. Ai nuk u lajmërua në prokurori andaj gjykata ka lëshuar shkresë për arrestim dhe ai me dhunë është sjellë në objektin e prokurorisë për t’u intervistuar” citohet të ketë thënë kryeprokurori Beka.
Nga ana e saj policia e Kosovës sqaroi se urdhër arresti për Molliqajn është nxjerrë më 12 maj të këtij viti, do të thotë një ditë më parë.
PSD me anë të një deklarate të hënën në mëngjes kërkoi lirimin e menjëhershëm të deputetit Dardan Molliqaj. “PSD është për shtet të së drejtës, ku respektohet liria për protestë dhe kritikë. Prandaj, për ne është e papranueshme çfarëdo përpjekje për cenimin e tyre” shënohej në reagimin e PSD-së.
PSD e Kosovës, është parti e krijuar pas shkëputjes nga Vetëvendosjes. Ajo nuk është parti e koalicionit qeveritar, por ka mbështetur nismat e qeverisë. Vetë zoti Molliqaj ka qenë një prej njerëzve kryesorë të Vetëvendosje. Kretari i PSD Shpend Ahmeti është kryetari i Komunës së Prishtinës. Molliqaj është bashkëshorti i ministres së arsimit të Shqipërisë Besa Shahini.