Programi europian për pushtetin vendor, Rama: Shqipëria shihet si vend anëtar i BE-së në vitet që vijnë

Në shënimet e javës në podcastin “Flasim”, kryeministri Edi Rama renditi disa prej zhvillimeve më të rëndësishme të ditëve që lamë pas, duke i lidhur me rrugëtimin europian të Shqipërisë dhe modernizimin e qeverisjes.

Një nga momentet kryesore të javës ishte lançimi i programit “EU4Municipalities II”, faza e dytë e nismës së mbështetur nga Bashkimi Europian, e cila synon forcimin e pushtetit vendor dhe rritjen e kapaciteteve të bashkive për të qenë më të gatshme në procesin e anëtarësimit në BE.

Rama e cilësoi këtë program si një hap të rëndësishëm për modernizimin e qeverisjes vendore.

“Ky program lidhet drejtpërdrejt me modernizimin e qeverisjes vendore, me forcimin e rolit të bashkive në procesin e anëtarësimit në Bashkimin Europian dhe me rritjen e kapaciteteve të tyre për të thithur më shumë fonde nga BE,” u shpreh Kryeministri.

Ai shtoi se programi është një urë ndihmëse për të përcjellë më shumë dije dhe për të rritur vetëdijen e bashkive mbi rolin e tyre në raport me BE.

“Ky program është një fakt që vjen në kohën e duhur si pjesë e tërësisë së fakteve që provojnë se Bashkimi Europian është gjithmonë e më pranë, se Shqipëria është gjithmonë e më shumë një vend që shihet si anëtar i BE, jo në të ardhmen e largët, por në vitet që vijnë,” theksoi Rama.

Programi “EU4Municipalities II” pritet të sjellë një ndikim të drejtpërdrejtë në rritjen e kapaciteteve të pushtetit vendor, duke e bërë atë më të aftë për të përballuar sfidat e integrimit europian dhe për të përmirësuar shërbimet ndaj qytetarëve.