Protesta e 54-të në Tiranë: Nesër më shumë!

Thirrje të forta kundër kryeministrit Edi Rama janë dëgjuar gjatë marshimit të protestuesve në rrugët e Tiranës, në protestën e 54-të të organizuar kundër qeverisë.

“Edi Rama, jep dorëheqjen”, “Ju erdhi fundi”, “140 deputetë, të gjithë analfabetë” dhe “Rama, Sala, SPAK, ju…” ishin disa nga sloganet që protestuesit hodhën gjatë tubimit.

Qytetarët pjesëmarrës deklaruan se do t’i vazhdojnë protestat dhe se nuk do të tërhiqen nga kërkesa për largimin e kryeministrit Edi Rama. Sipas tyre, protesta do të vijojë deri në përmbushjen e kërkesave politike të paraqitura nga lëvizja qytetare.

Gjatë marshimit, protestuesit iu drejtuan edhe Prokurorisë së Posaçme, duke kërkuar hetime dhe veprime konkrete ndaj kryeministrit dhe zyrtarëve të tjerë të lartë.

Protesta vijoi në disa nga rrugët kryesore të kryeqytetit. Pjesëmarrësit thanë se aksioni qytetar nuk do të ndalet dhe se tubimet do të vazhdojnë edhe në ditët e ardhshme.