Raduloviq: Mali i Zi vazhdon përafrimin e sektorit të transportit me standardet evropiane

Mali i Zi ka arritur përparim të rëndësishëm në integrimin e sektorit të transportit me Bashkimin Evropian, sidomos përmes përafrimit të legjislacionit me acquis-in e BE-së dhe përparimit në negociatat për kapitullin 14 — Politika e Transportit dhe kapitullin 21 — Rrjetet Trans-Evropiane. Kështu deklaroi ministri i Çështjeve Detare, Filip Raduloviq, i cili foli në kuadër të konferencës “Connecting Europe Days” që po mbahet në Bruksel, siç njofton RTCG-ja.

Raduloviq i kushtoi vëmendje të veçantë sektorit detar, duke theksuar se Mali i Zi vazhdon përafrimin me kërkesat e Agjencisë Evropiane për Sigurinë Detare (EMSA) dhe konventat ndërkombëtare përkatëse.

“Që nga fillimi i mandatit të kësaj qeverie, pothuajse i kemi eliminuar të gjitha mangësitë në raport me standardet e EMSA-së. Njëkohësisht, përmes forcimit të kontrollit inspektues po rritet edhe më tej kontrolli në lundrimin detar”, tha Raduloviq.

Ministri nënvizoi gjithashtu se pjesë e rëndësishme e strategjisë së përgjithshme të transportit është zhvillimi i Portit të Tivarit si nyje rajonale logjistike e transporti.

“Përmirësimi i infrastrukturës portuale, përfshirë punimet për thellimin e akvatoriumit, së bashku me modernizimin e infrastrukturës hekurudhore dhe rrugore, duhet t’i mundësojë Malit të Zi një lidhje më të mirë me korridoret evropiane të transportit”, tha Raduloviq.

Gjatë fjalës së tij, ministri Raduloviq njoftoi se në dy vitet e ardhshme fokusi do të jetë që sistemi i transportit të jetë gati për funksionimin në tregun e vetëm evropian, jo vetëm në letër, por edhe në praktikë.

Burimi: Primorski