Milatoviq: Qytetarët duhet të zgjedhin drejtpërdrejt kryetarët e komunave

Presidenti i Malit të Zi, Jakov Milatoviq, mori pjesë në shënimin e 54-vjetorit të Bashkësisë së Komunave të Malit të Zi, nga ku dërgoi mesazhin se vetëqeverisjet lokale të forta, të përgjegjshme dhe funksionale duhet të luajnë rol të rëndësishëm në fazën përmbyllëse të rrugës evropiane të Malit të Zi, siç njofton RTCG-ja.

“Qytetarët e ndjejnë shtetin më drejtpërdrejt pikërisht në nivel lokal, përmes cilësisë së shërbimeve, infrastrukturës, mbrojtjes së mjedisit, mundësive për punë dhe kushteve në të cilat rrisin familjet e tyre”, tha Milatoviq. Sipas tij, demokratizimi i plotë i vetëqeverisjeve lokale do të ndodhë vetëm atëherë kur qytetarët t’i zgjedhin drejtpërdrejt kryetarët e komunave, ndërsa shprehu keqardhjen që shumëkush në nivelin shtetëror nuk e ka kuptuar këtë. “Komunat nuk duhet të jenë peng i pushteteve shtetërore”, shtoi ai.

Presidenti vlerësoi pozitivisht Ligjin e ri për vetëqeverisjen lokale, duke thënë se ai krijon një kuadër të rëndësishëm për thellimin e decentralizimit, përgjegjësisë, funksionalitetit dhe cilësisë së shërbimeve publike në nivel lokal. Ai theksoi gjithashtu rëndësinë e fondeve evropiane dhe nevojën që vetëqeverisjet lokale të kenë kapacitete për t’i kthyer mjetet në dispozicion në projekte konkrete zhvillimi. Sipas raportimit të RTCG-së, Milatoviq përshëndeti edhe zgjidhjen sipas së cilës çdo njësi e vetëqeverisjes lokale duhet të ketë një shërbim për integrimet evropiane, i cili do të merret me përgatitjen dhe menaxhimin e projekteve të financuara nga fondet e Bashkimit Evropian.

Milatoviq u ndal edhe te modeli i paralajmëruar “Euro”, duke thënë se është mirë që fokusi i debatit publik është drejtuar sërish te rritja e pagave dhe standardit jetësor të qytetarëve, por se reformat ekonomike duhet të jenë transparente, të përgjegjshme dhe të qëndrueshme — edhe për komunat. Ai paralajmëroi se ndryshimet e pagave dhe sistemit tatimor mund të ndikojnë ndryshe në buxhetet lokale, pasi kapacitetet fiskale të komunave nuk janë të njëjta, ndaj kërkohet analizë e saktë e efekteve të çdo reforme për çdo vetëqeverisje lokale dhe, nëse është e nevojshme, mekanizma mbrojtjeje për buxhetet lokale.

Presidenti bëri thirrje për vazhdimin e dialogut mes Qeverisë, Bashkësisë së Komunave, udhëheqjeve lokale, punëdhënësve dhe të punësuarve, si dhe kujtoi se gjatë këtij viti ka nisur vizitat nëpër komunat malazeze për të biseduar drejtpërdrejt me qytetarët, bizneset dhe përfaqësuesit e bashkësive lokale. “Evropa e vitit 2028 duhet të ndihet në çdo qytet dhe çdo fshat tonin — në rrugë më të mira dhe shërbime publike, mjedis më të pastër, investime të reja, shkolla e kopshte moderne dhe më shumë mundësi për të rinjtë që të qëndrojnë, punojnë dhe krijojnë aty ku kanë lindur”, tha Milatoviq.