Rasti i 52-vjeçarit nga Durrësi, Ministria e Shëndetësisë nis hetim të thelluar administrativ

Ministria e Shëndetësisë dhe Mirëqenies Sociale ka urdhëruar nisjen e një hetimi të thelluar administrativ lidhur me trajtimin e rastit të pacientit 52-vjeçar me inicialet A.A., nga Durrësi.

Sipas njoftimit zyrtar, “hetimi do të shqyrtojë në mënyrë të plotë jo vetëm procedurat dhe masat e ndërmarra nga strukturat spitalore, por edhe veprimet dhe përgjegjësitë e strukturave të shërbimit social të përfshira në këtë rast”.

“Në kuadër të procesit, drejtues të Operatorit të Shërbimeve të Kujdesit Shëndetësor dhe të Shërbimit Social Shtetëror ndodhen në terren për të kryer verifikime të drejtpërdrejta dhe për të mbikëqyrur zhvillimin e hetimit administrativ në strukturat përkatëse në qytetin e Durrësit.

Ndërkohë, pacienti vijon të marrë trajtim nën kujdesin e mjekëve në Spitalin Rajonal të Durrësit.

Po ashtu, autoritetet kanë nisur verifikimin e të gjithë dokumentacionit shëndetësor dhe administrativ, si dhe të përgjegjësive të personave të përfshirë në menaxhimin dhe transportimin e pacientit”, thuhet në njoftimin e Ministrisë së Shëndetësisë.

Ministria e Shëndetësisë thekson se “mbetet e angazhuar për të garantuar transparencë të plotë, zbardhjen e të gjitha rrethanave të rastit dhe marrjen e çdo mase administrative apo ligjore që do të rezultojë e nevojshme nga hetimi”.