Renaud-Basso për TVCG-në: BERZH-i gati të mbështesë infrastrukturën dhe ekonominë e Malit të Zi

Mali i Zi ndodhet në fazën përfundimtare të integrimit evropian dhe Banka Evropiane për Rindërtim dhe Zhvillim (BERZH) është e gatshme të mbështesë jo vetëm projektet e mëdha infrastrukturore, por edhe ndërmarrjet e vogla dhe të mesme, që ato të përshtaten më mirë me standardet evropiane dhe të bëhen më konkurruese në tregun e Bashkimit Evropian, deklaroi për Televizionin e Malit të Zi (TVCG) presidentja e BERZH-it, Odile Renaud-Basso, siç njofton RTCG-ja.

Nga ndërtimi i autostradës Tivar–Bollare deri te unazat rreth Podgoricës dhe drejt Tivarit, BERZH-i vazhdon të mbështesë projektet e mëdha infrastrukturore në Mal të Zi. Sipas raportimit të RTCG-së, Renaud-Basso tha se banka ka financuar tashmë me 200 milionë euro ndërtimin e një segmenti të autostradës Tivar–Bollare dhe nuk e përjashton rritjen e kësaj shume, për shkak të mungesës së fondeve të financimit. Dy projektet e tjera janë në fazë përgatitore, ku po vlerësohet ndikimi i tyre në mjedis dhe në komunitet, ndërsa mënyra e financimit është ende në diskutim; bëhet fjalë për disa qindra milionë euro për secilin segment, sepse projektet janë shumë të shtrenjta dhe komplekse, me tunele dhe ura.

Mbështetja e BERZH-it nuk synon vetëm infrastrukturën e madhe: një pjesë e rëndësishme e veprimtarisë së bankës ka të bëjë me ndërmarrjet e vogla dhe të mesme, të cilat i ndihmon përmes bankave partnere për financim dhe përmes programeve të këshillimit e ndihmës teknike. Sipas presidentes së bankës, perspektiva e anëtarësimit në BE hap një mundësi të rëndësishme për këto biznese, të cilat banka i ndihmon të përshtaten me standardet e reja evropiane, të zhvillojnë eksportet dhe ta shfrytëzojnë sa më mirë aksesin në tregun evropian. Si drejtim veprimi për periudhën e ardhshme ajo veçoi edhe mbështetjen për gratë në sipërmarrje dhe për të rinjtë, sidomos për shkak të sfidave demografike me të cilat përballet Mali i Zi.

Renaud-Basso vlerësoi se Mali i Zi ka potencial të bëhet qendër rajonale e energjisë elektrike, veçanërisht për shkak të lidhjeve me Italinë dhe me shtetet fqinje. Ky është, sipas saj, edhe një prioritet strategjik që sjell konkurrueshmëri, përmes hidrocentraleve dhe shfrytëzimit të energjisë së erës dhe asaj diellore, ndërsa interesi i investitorëve të huaj për energjinë e rinovueshme në Mal të Zi tashmë është i dukshëm. Ajo theksoi, siç njofton RTCG-ja, se BERZH-i zhvillon ankande si një mënyrë për të tërhequr investitorë dhe për të nxitur konkurrencën, gjë që i mundëson shtetit çmime më të favorshme.

Përtej energjisë, presidentja e BERZH-it sheh potencial për forcimin e konkurrueshmërisë së ekonomisë malazeze edhe në turizëm dhe në bujqësi, sidomos në zhvillimin e prodhimit organik dhe në plasimin e produkteve vendase në tregun evropian. Ajo e veçoi edhe sektorin e teknologjisë si një mundësi shtesë zhvillimi, rritja e të cilit mund të kontribuojë në diversifikimin e ekonomisë dhe në krijimin e mundësive të reja të biznesit në Mal të Zi.