Rezulton fals alarmi për bombë në Durrës

Një alarm fals për bombë te gjimnazi ‘Naim Frashëri’, tronditi qytetin bregdetar mëngjesin e sotëm. Në derën e gjimnazit u gjet një pako e dyshimtë me celular sipër.

Pakoja u vu re nga kalimtarët, të cilët njoftuan në sallën operative të komisariatit të policisë së Durrësit. Policia mbërriti menjëherë në vendin e ngjarjes pas sinjalizimit, ndërkohë që pak minuta më vonë mbërritën edhe forcat antieksploziv nga Tirana.

Në vendin e ngjarjes u vendos perimetri i sigurisë dhe u ndalua qarkullimi i mjeteve pranë kësaj zone, nga rreziku i shpërthimit të mundshëm. Forcat xheniere bënë ekzaminimin e pakos së dyshimtë e cila, nga kontrollet e ushtruara rezultoi se ishte false.

Ky është alarmi i dytë për bombë në një shkollë në Durrës, që rezulton fals, brenda kësaj jave. Të hënën, një alarm fals për bombë në një gjimnaz te Drejtoria Arsimore e qytetit të Durrësit,  alarmoi policinë.

Një telefonatë në sallën operative të policisë, dha alarmin për bombë në këtë institucion. Menjëherë pas sinjalizimit, policia mbërriti në vendin e ngjarjes, ku bllokoi kalimin e qytetarëve. Në vendin e ngjarjes, u gjend një celular mbi një pako të vogël mbështjellë me letër natriban dhe fije plastike.