Romano Prodi: “Kam parë shumë demonstrata, por kurrë pa një objektiv, vetëm për dhunë”

– Ish-kryeministri italian Romano Prodi ka shprehur shqetësimin për aktet e dhunës dhe shkatërrimet e regjistruara në Milano gjatë fundjavës së kaluar, duke vënë në dukje karakterin e pazakontë të protestave.

I ftuar në emisionin “Otto e mezzo” të televizionit La7, në një intervistë me gazetaren Lilli Gruber, Prodi tha se ishte tronditur nga fakti se demonstratat nuk kishin një objektiv të qartë dhe dukeshin të përqendruara te shkatërrimi dhe dhuna.

“Kam parë shumë demonstrata gjatë jetës sime, por nuk kam parë kurrë demonstrata pa flamuj, pa një objektiv, vetëm për shkatërrim, për dhunën në vetvete”, u shpreh ai.

Prodi theksoi se një nga aspektet më shqetësuese është pasiguria lidhur me kohëzgjatjen e këtij fenomeni, i cili mund të përfundojë shpejt, por mund të vijojë edhe për një periudhë të gjatë.

“Kjo më shqetëson jashtëzakonisht shumë, sepse mund të përfundojë nesër, por këto gjëra mund të zgjasin shumë në kohë. Prandaj duhet të jemi vërtet shumë të kujdesshëm”, deklaroi ish-kryeministri italian.

Ai nënvizoi gjithashtu se dhuna duhet dënuar në çdo rrethanë, por se është e nevojshme të analizohen edhe problemet që qëndrojnë pas këtyre episodeve, me qëllim parandalimin e përsëritjes së tyre.

“Dhuna duhet të dënohet në çdo mënyrë”, theksoi Prodi, duke shtuar se duhet të nisë një përpjekje për të kuptuar se çfarë duhet bërë që ngjarje të tilla të mos përsëriten.